Asamblea Nacional Constituyente, organismo crea pa e regimen Chavista pa ignora e Asamblea Nacional legitimo, cu ta domina pa oposicion desde 2015, lo keda disolvi na december venidero, despues di tres aña y mey di actividad legislativo na fabor di e regimen Chavista, cu no tin reconocimento den mayoria di e paisnan cu gobierno democratico.
Eanuncio di fin di e Asamblea Constituyente a ser haci pa e propio Nicolas Maduro. “Asamblea Nacional Constituyente ta bay funciona te december. Asina ya a dicidi,” Maduro a expresa durante un videoconferencia di Partido Socialista Uni di Venezuela (PSUV).
Gobierno a crea e Asamblea Constituyente 30 di juli2017, sin participacion di oposicion y no a haya reconocimento di comunidad internacional, cu ta considera e organismo ilegitimo.
Diosdado Cabello, segundo homber fuerte di Chavismo y presidente di e Constituyente, apenas recupera di contagio cu Covid-19, lo ta encarga cu e proceso di clausura, asina Maduro a anuncia.
Juan Manuel Track, politologo y docente di Universidad Catolico Andres Bello, ta splica cu e Constituyente a converti di inmediato den un “simulacion di Parlamento”, asumiendo competencianan legislativo y su papel di tuma decision cu tabata desafia ley y e propio Constitucion. “Su trabao no tabata otro cu hustifica medida di gobierno. Esey no a sirbi Maduro hopi, pasobra e no a haya reconocimento ni legitimidad, pa e forma con a convoca esaki,” Track a conta Voice of America.
Ademas e regimen a haya problema na nivel internacional, unda cierto contractnan segun Constitucion mester aprobacion di Asamblea Nacional, pero e partnernan externo tabata exigi aprobacion pa e Asamblea Nacional legitimo. Hasta aliadonan manera Rusia tabata insisti riba legitimidad di e Asamblea berdadero.
