(Lapatilla/Bloomberg) – Presidente ‘de facto’ Nicolas Maduro a afirma den un entrevista exclusivo cu Erik Schatzker pa Bloomberg Television, cu e ta dispuesto di ricibi inversionista internacional na e pais.
Maduro a manda un mensahe na tur inversionista: “Bin wak Venezuela. Bin pa conoce nos,” el a bisa den e entrevista, pero aparentemente el a lubida e cantidad di empresa cu mester a bandona e pais pa via di e restriccionnan severo na cual nan a keda someti pa e regimen di e mesun Maduro.
El lider di e dictadura na Venezuela a detaya cu ora un inversionista stranhero drenta aeropuerto “e por mira e impacto”. Si, e impacto cu un aeropuerto internacional den ruina ta duna, cu masha poco aerolinea prestando servicio comercial y e deplorable condicion fisico den cual e ta.
Ta berdad cu na Venezuela ta existi un sinnumero di negoshi chikito cu miras pa futuro pa nan tin exito, si tin condicion na e pais cu ta permiti esey. Sin embargo, e empresanan ey no a haya apoyo di capital di estado. Cada comerciante a landa contra coriente pa por mantene nan mes a flote den un economia cada vez mas dificil.
Y no tabata solamente e empresa priva cu mester a lucha, e empresanan di estado cu na cierto momento tabata representa Venezuela cu nan producto, servicio, calidad y excelencia, a bay den decadencia danki na e poco o ausente inversion cu e regimen a realiza pa loke ta mantenimento y mehoracion fundamental.
Encuanto e tema aki, e aprendiz di regimen Cubano a resalta den su mensahe na e inversionista stranhero cu “ora bo mira nos empresarionan, bo lo mira un mundo di oportunidad”. Maduro a insisti cu “Venezuela lo bay ta converti den pais di oportunidad pa inversion, presente y futuro”.
