Presidente de facto di Venezuela, Nicolas Maduro, a anuncia e incorporacion di un contingente di miliciano Chavista den Guardia Nacional Bolivariano, pa “nan asumi plenamente labornan di siguridad di nos pueblo,” y cu esaki tabata cana den dos direccion. Uno, converti Forsa Arma Nacional Bolivariano den un institucion na servicio di e partido di gobierno, y otro, cu ta debilita e institucion aki, cu ta e di dos cu mas integrante, unda ta spera menos resistencia.
Esaki a tuma luga durante celebracion di e 82 aniversario di creacion di Guardia Nacional, evento realisa Academia Militar di Ehercito na Fuerte Tiuna. Maduro a recorda e sucedido na Avenida Bolivar na Caracas, di un aña pasa, tempo cu un drone tabata e instrumento den un atentado contra bida di e presidente, o al menos asina a presenta e caso na publico. Ademas, el a bolbe promove oficialnan cu ta mas cerca di su entorno personal y ningun cu ta mas cerca di Diosdado Cabello.
Un oficial halto a considera cu incorpora miliciano den Guardia Nacional “lo significa un paso cu ta visualisa e intencion di converti di manera progresivo y definitivo e forsanan arma, den un institucion na servicio di e partido, manera ta custumber y necesario den regimennan totalitario.” El a sigura cu “No por a controla e Forsa Arma ainda, e ta conserva ainda hopi aspecto doctrinario y di funcionamento cu nan no por a desmantela.”
“A crea a milicia pa kibra e monopolio di forsa arma. Ora a fracasa den esaki pasobra no por a consolida e milicia, cu ta den actualidad inoperante, cu poco peso specifico y practicamente un caricatura di un cuerpo arma, a pensa riba e papel aki pa GNB como contra peso pa Forsa Arma,” el a conclui.
