Presidente de facto Venezolano Nicolas Maduro a informa di e inicio di operacion di e expansion di e planta mezclador di e Compleho Petrokimico Jose Antonio Anzoategui, un proyecto den cual China National Petroleum Corp (CNPC) y Pdvsa ta participa.
Nicolas Maduro a elogia un biaha mas e aliansa cu China, pais cu el a gradici pa “tur e cooperacion” den ehecucion di e proyecto conhunto, apenas cuatro dia despues cu Estadonan Uni a decreta blokeo di tur bienes estatal Venezolano den teritorio Mericano.
Durante un acto di gobierno, transmiti di forma obligatorio pa radio y television, tabata presente tambe e embahador di China na Venezuela, Li Baorong.
Maduro a insisti cu e obra inaugura ta “gran noticia pa e industria petrolero” y cu e ta un ratificacion di cu China y Venezuela lo sigui riba e caminda di prosperidad y desaroyo.”
“No por para actividad economico, mester aumenta esaki,” Maduro a bisa, y a insisti cu su pais ta den “fase di resistencia activo” pa enfrenta “e medidanan coercitivo unilateral di e blokeo criminal di gobierno Mericano.”
Gobierno di Maduro a califica e medida Mericano como “terorismo economico” y a bisa cu esaki lo afecta compra di cuminda y medicamento, aunke Estadonan Uni ta bisa lo contrario.
Maduro a afirma cu e pais ta na “un momento historico”, ya cu segun e mandatario ta habriendo e oportunidadnan di “un economia autosustenta, sustentable, cu motornan propio, cu definitivamente lo substitui e modelo bieu rentista dependiente.”
E planta di CNPC y Pdvsa ta mescla crudo ultrapisa di Orinoco cu crudo mas liviano pa produci crudo ‘Merey 16’ principalmente pa exportacion pa China, como pago pa e prestamonan Chines na gobierno Venezolano y Pdvsa.
