(AP) — Presidente Venezolano, Nicolas Maduro no tabata invita na un cumbre di lidernan occidental na juni. Pero pa october, el a biaha na Egipto pa un conferencia unda el a haci joke cu presidente Frances, Emmanuel Marcon y a duna man na John Kerry, enviado di clima pa Merca.
E encuentronan, cu un Maduro felizmente sonriendo henter e rato, tabata cuidadosamente graba riba video, publica riba rednan social y transmiti riba television estatal Venezolano.
Algun luna cortico di un decada desde cu el a hereda liderazgo di e pais despues di morto di presidente Hugo Chavez, Maduro ta trahando pa recupera e reconocemento internacional cu el a perde na momento cu su reeleccion na 2018 a keda considera como un farsa pa decenas di pais.
E esfuersonan aki tambe ta destina na reforsa su forsa na cas, mientras e ta drenta 2023 mientras presion ta aumenta pa un eleccion presidencial liber y husto e siguiente aña.
Crucial pa calculacionnan di Maduro ta e activo top di su pais – petroleo – y e guera na Ucrania. E pais Sur Americano tin e reservanan mas grandi proba di petroleo na mundo, pero no ta suministra e mercado occidental desde cu Merca a impone sancionnan economico pisa mientras democracia y derechonan humano a deteriora despues di reeleccion di Maduro.
Comunidad internacional kier “un sorto di contribucion pa seguridad di energia global, y cu Rusia fuera di e mercado, petroleo Venezolano ta bira atractivo atrobe”, segun Ryan Berg, director di programa na Centro pa Estudio Strategico y Internacional, un think-tank basa na Washington.
E intento di Maduro pa limpia su imagen ta bin mientras hopi di e condicionnan cu a convertie den un ‘paria’ internacional ta sin cambio.
Expertonan independiente trahando cu e cuerpo top pa derechonan humano di ONU a documenta un atake sistemico riba oponentenan di gobierno, periodista y otronan. Nan rapport na september a alega cu Maduro personalmente a ordena detencion di oponentenan di gobierno, kendenan a sufri shock electrico, asfixia y otro actonan cruel den custodia.
Maduro tin problemanan serio di fluho di cash, y kier acceso na e sistema financiero internacional y mercado petrolero Mericano. Pero e unico manera cu Maduro por haya acceso na dollar atrobe ta door di participa den negociacion cu oposicion.
Negociacion entre Maduro y oposicion, incluyendo e fraccion sosteni pa gobierno Mericano, a keda suspendi pa mas cu un aña despues cu un di su aliadonan clave a keda extradita pa Merca for di Africa. Pero ambos banda a yega na un acuerdo significante pa financia programanan hopi necesario na fin di november. E acuerdo ta bay resulta den un fondo maneha pa ONU pa financia programanan di salud, cuminda y educacion na Venezuela. Ta bay saca e placa for di e activonan di e pais congela den exterior, y no ta spera di bay directamente na gobierno di Maduro. Pero esaki no a stop e administracion di promove e acuerdo como e recuperacion di fondonan “secuestra” pa Merca.
Sinembargo, ainda mester yega na acuerdo di e condicionnan pa e proximo eleccion presidencial na 2024, e liberacion di prisoneronan politico, y fin riba prohibicion contra hopi politico di oposicion pa postula pa e presidencia.
Oposicion tin plan pa tene eleccionnan primario proximo aña. E candidato potencial mas cla ta Juan Guaido, maske su sosten den y pafo di Venezuela a cay pisa desde cu el a declara su mes un presidente rival di Maduro na 2019, mientras tabata lidera e Congreso – e tempo aya domina pa oposicion – y a yama decenas di miles di manifestante anti-Maduro riba caya.
Pero tin algun logro pa Maduro.
Pa largo un sostenedor di oposicion Venezolano – e gobierno di bisiña Colombia – awo ta lidera pa e prome presidente iskierdista di e pais, Gustavo Petro. Despues di asumi su cargo e aña aki, Petro inmediatamente a move pa restaura relacionnan cu Venezuela. Den algun siman, Maduro tambe ta bay recupera reconocemento di Brazil, manera señala pa presidente Luiz Inacio Lula da Silva.
Berg a bisa cu e region ta parce di ta moviendo for di su posicion anti-Maduro, “principalmente pa motibo di e gobiernonan cu a bin na poder den eleccionnan reciente.”
El a bisa cu algun gobierno ta trahando bao di e idea cu Venezuela su “democratisacion ta bay ta un proceso largo “involucrando negociacion, eleccionnan multiple y alivio di sancion, a diferencia di un cambio na
“un punto discreto den tempo.”
