(ElNacional) – Nicolas Maduro a cualifica diahuebs ultimo como “modelo colonial” e condicionnan cu Merca ta impone pa otorga licencia pa negosha e crudo Venezolano, cu ta prohibi pago di placa na empresanan estatal di e pais.
“Si bo ta produci algo; gas, petroleo of cualkier producto y bo ta bende esaki na un empresa of na otro pais, locual bo ta spera ta cu bo ta ser paga manera abo ta paga e bienes of servicio cu nan ta bendebo na mundo,” Maduro a remarca.
Merca a impone un lista di sancionnan pa Venezuela cu cual el a busca, sin exito, presiona pa e caida di e oficialista, cu ta inclui e prohibicion di comercialisa e petroleo di e nacion desde 2019. Sinembargo, mey mey di e crisis energetico provoca pa e guera na Ucraina, e Cas Blaco (White House) tabatin algun acercamento cu Maduro y a flexibilisa e embargo ey.
E empresa Mericano Chevron a ricibi na november un licencia di e Oficina di Control di Activonan Stranhero (OFAC) pa retoma operacionnan na Venezuela, cu e condicion cu e placa producto di e bentanan ser usa pa paga e debe cu e estatal PDVSA tin cu e gigante energetico. Anteriormente, den luna di maart, empresanan Europeo manera Eni y Repson tambe a ricibi luz berde pa opera na e pais cu e mesun condicionnan.
Trinidad y Tobago a ser autorisa pa desaroya un proyecto di gas cu Venezuela cu condicionnan specifico cu mester ser cumpli.
“Ki boso ta kere? Con nos por yama e cos ey? Un burla pa e paisnan soberano di mundo. Mi ta yama e paisnan soberano y e gobiernonan soberano di Latino America y di Caribe pa denuncia e modelo colonial di OFAC”, Maduro a critica den un acto cu a celebra e huramentacion di Hugo Chavez como presidente 24 aña pasa.
