(AFP) – Presidente Venezolano, Nicolas Maduro a bisa diasabra cu Merca a manda 324 migrante Venezolano na un prison di maximo seguridad na El Salvador, un cifra mas halto di loke a duna anteriormente, pero a bisa tambe cu ni Washington ni San Salvador a dun’e un lista oficial.
Presidente Mericano, Donald Trump a invoca legislacion inusualmente usa, di tempo di guera na Merca, pa bula e Venezolanonan na El Salvador dia 16 di maart sin duna e migrantenan ningun sorto di audiencia den corte.
Presidente Salvadoreño, Nayib Bukele a bisa cu 238 Venezolano a keda manda na su pais despues cu Merca a acusa nan ta parti di e gang criminal, Tren de Aragua.
E ta un “berguensa loke a ser cometi cu e secuestro y desaparicion forsa di 324 migrante Venezolano cu a keda hiba na un campo di concentracion Nazi na El Salvador,” Maduro a bisa na un reunion na Caracas cu ministernan di Exterior di e bloc Aliansa Bolivariano di Pueblonan di Nos America, ALBA.
Maduro no a splica di unda a saca e cifra, y a reconoce cu ainda e no tin un lista oficial. “Oficialmente ningun autoridad ni di Merca ni di El Salvador a manda un comunicacion oficial reconociendo ken a keda secuestra,” el a bisa.
ALBA ta consisti di Antigua y Barbuda, Bolivia, Cuba, Dominica, Grenada, Nicaragua, St. Kitts and Nevis, St. Vincent and the Grenadines y St. Lucia, y varios di e ministernan atendiendo e reunion a sostene Maduro.
“E secuestro sin hurisdiccion ni debido proceso, si huicio, defensa of sancion di un corte competente, y manda na paisnan tercero door di Merca, di migrantenan Venezolano y di cualkier nacionalidad, ta un acto atroz y ta constitui trato cruel inhumano y degradante,” minister di Exterior Cubano, Bruno Rodriguez a bisa.
“E criminalisacion di migrante, nan transferencia na centronan di detencion den paisnan tercero (…) no ta algo cu nos por acepta,” minister di Exterior Boliviano, Celinda Sosa a agrega.
Maduro ta pushando pa manda e grupo na Venezuela y a contrata un bufete legal na El Salvador.
E tambe a papia cu Secretario General di ONU, Antonio Guterres pa pidi pa nan proteccion.
Venezuela y Merca a kibra relacion diplomatico na 2019.
Na januari, nan tabatin un reencuentro pa acorda riba vuelonan di deportacion cu despues a keda suspendi, ora Trump a revoca e licencia di compania di petroleo Chevron pa opera den e pais Sur Americano.
E vuelonan a reanuda un siman atras, y den total, Venezuela a ricibi 743 deportado for di Merca. Otro 229 tabata spera di yega ayera diadomingo.
