Presidente electo di Guatemala, Alejandro Giammattei, a yega Venezuela pa un bishita na gobierno interino di Juan Guaido, pa expresa personalmente su apoyo na su gobierno, cu ta ser considera pa Guatemala e gobierno legitimo di Venezuela, tambe bao di actual gobierno di presidente Jimmy Morales.
E bishita lo tabata un acto di respaldo di parti di e mandatario electo Guatemalteco, cu anteriormente caba a expresa su apoyo na e lucha opositor pa recuperacion di su democracia.
Na su yega sin embargo, e regimen di Nicolas Maduro a actua manera por a spera di nan: no a permiti Giammatei drenta e pais, mientras cu un delegacion di gobierno interino di Guaido tabata na aeropuerto Maiquetia caba pa ricibi e mandatario.
Giammattei, di 63 aña di edad y canando cu kruk, como paciente di multiple sclerose di varios aña, a ser escolta pa autoridadnan di migracion, cu a percura pa e sali di e pais atrobe riba e mesun avion. Giammatei tabata acompaña pa Pedro Brolo, e proximo canciyer den e gabinete designa pa Giammatei.
Segun informacion comparti pa e ekipo di comunicacion di e presidente electo, e obhetivo di Giammattei durante su bishita na Venezuela tabata pa invita personalmente e presidente interino, Juan Guaido, na ceremonia di inicio di su presidencia dia 14 di januari 2020 na Guatemala.
Despues cu e no por a drenta e pais, Giammattei a manifesta su apoyo na Guaido y a sigura cu “lo percura pa scucha su voz den henter e continente”.
