Regimen di Nicolas Maduro a instala dialuna pasa un mesa di dialogo cu ‘mini partidonan’ di ‘oposicion’ sin notifica Noruega, cu ta actua como mediador den e otro combersacion cu e partidonan grandi den oposicion contra dictadura Chavista, asina Gerardo Blyde, negociador di e delegacion di gobierno interino di Juan Guaido, a denuncia.
Chavista y opositornan di Venezuela a reuni den ultimo lunanan cu gobierno di Noruega pa trata na yega na un salida pa e crisis economico y politico profundo den cual Venezuela ta pasando, pero e dialogo ey a stanca.
“Tin mala fe di Maduro, e tabata hungando riba dos mesa. Tras di cortina el a crea otro opcion na momento cu esun aki a bira dificil p’e,” Blyde a bisa.
“E Noruegonan no tabata sa di nada di loke tabata pasando, nan tabat’ey fin di siman y ora nan a bay Maduro a presenta e propuesta,“ Blyde a detaya.
Ni Ministerio di Comunicacion Venezolano, ni Canciyeria di Noruega a responde di biaha riba solicitud pa comentario.
Regimen di Maduro a acorda dialuna pa inicia otro dialogo cu representante di cuatro partido opositor, sin mediacion internacional, buscando acuerdonan parcial. Poco ora despues Maduro a sugeri e posibilidad di reanuda paralelamente e negociacion via Oslo.
Oposicion bao liderazgo di Guaido, a propone instala un Conseho di Gobierno di transicion di nuebe miembro, cu lo convoca eleccion presidencial den nuebe luna. Pero segun Blyde, e representantenan di Maduro a keda sin duna respuesta.
Blyde no ta kere cu e mesa nobo di dialogo nacional por logra un salida pa e crisis pasobra Estadonan Uni, Europa y Canada, cu a impone sancion, ta reconoce Guaido como Presidente interino y no e grupo minoritario cu ta participa na e dialogo paralelo aki.
