E subsecretario di Oficina di Asunto di Hemisferio Occidental, di Departamento di Estado Mericano, Michael G. Kozak, asigura cu Nicolas Maduro kier un “negociacion secreto” cu Cas Blanco tocante futuro di su pais.
“Estadonan Uni ta negociando cu Maduro? NO. Maduro kier un negociacion secreto cu gobierno Mericano, pero nos ta apoya Juan Guaido como presidente interino,” Kozak a skirbi riba su cuenta oficial di Twitter.
Kozak a probecha pa insisti riba e Cuadro pa Transicion Democratica na Venezuela cu Cas Blanco ta propone, cu ta consisti di tanto Maduro como Guaido apartando nan mes pa conforma un gobierno interino cu ta guia e pais te na eleccion presidencial y parlamentario “liber” den un plazo di seis pa diesdos luna.
E plan cu Merca ta propone ta cu ambos por presenta nan mes como candidato den eleccion, aunke secretario di Estado, Mike Pompeo, a mustra cu ta sigur cu Maduro “lo no bolbe goberna” pasobra Guaido ta “e politico mas popular di Venezuela”.
E plan Mericano ta recoge en realidad e propuesta cu e delegacion opositora haci na e regimen di Nicolas Maduro durante e ultimo dialogo politico di Venezuela, teni aña pasa entre Oslo y Barbados.
Maduro ya a rechasa e idea di Washington, aunke el a bolbe ofrece un dialogo cu henter oposicion, esun minoritario cu ken e ta dialoga caba, y esun mayoritario di Guaido, pa acorda solucion encuanto e pandemia di coronavirus. Guaido, cu a nenga di bolbe na mesa di negociacion, a subraya cu e plan Mericano no ta dirigi exclusivamente na Maduro, sino na henter chavismo, buscando asina crea ruptura interno.
Tambe Merca a acusa Maduro y 14 lider chavista di kier“inunda” Merca cu cocaina durante ultimo decadanan.
