Regimen di Nicolas Maduro, a traves di su canciyer Jorge Arreaza, a informa cu a manda un invitacion na e maximo autoridadnan di Union Europeo y di Organisacion di nacionnan Uni (ONU) pa participa como observador di e farsa electoral cu nan ta pretende organisa di a 6 di december proximo.
A traves di su cuenta oficial riba Twitter, Arreaza a revela cu: “Mi ta informa cu ayera nos a manda @antonioguterres y @JosepBorrellF un carta encuanto e garantianan amplio electoral acorda pa e venidero eleccion parlamentario, como tambe reiterando e invitacion pa Nacionnan Uni y Union Europeo participa como observador.”
Di otro banda, secretario di Estado di gobierno di Donald Trump, Mike Pompeo, a haci un breve mencion acerca di e problematica cu ta acercando na Venezuela cu e intencion di e regimen di Maduro di tene eleccion parlamentario cu no ta conta cu apoyo di gran mayoria di comunidad internacional.
Pompeo a sigura cu mas di 34 pais a asumi un consenso di rechaso pa e proposicion di Chavismo, y cu tur hende sa cu no ta existi caracter democratico pa cu e tema aki.
“Mas y mas nacion sa cu e eleccion fraudulento pa Asamblea Nacional pauta pa Maduro pa 6 di december di e aña aki no lo ta ni limpi ni liber,” el a manifesta.
Mientras tanto, lider opositor Juan Guaido a expresa cu unidad ta un necesidad practico pa enfrenta e dictadura. E pais ta desea acuerdo cu ta trece un solucion pa e crisis; no pa problema entre algun dirigente.”
Guaido ta tratando di haya tur forza opositor tras di su proyecto di Pacto Unitario y a bisa cu den e proximo dianan lo presenta esaki na e Venezolanonan pa cual ta busca e mayor consenso posible. En todo caso Guaido a haya apoyo di Democracia Cristian cu ademas a bisa cu efectivamente “Unidad ta un elemento importante y poderoso pa logra exito.”
