Nicolas Maduro a busca apoyo di e organisacion di paisnan productor di petroleo (OPEC), contra e sancionnan imponi pa Estadonan Uni, contra industria petrolero di e pais, citando e impacto riba prijs di petroleo y e riesgonan potencial pa otro miembro di e grupo di productor.
Un fuente familiarisa cu e tema a bisa cu e organisacion, di cual Venezuela ta miembro fundador, a nenga di emiti un declaracion formal. OPEC ta bisa cu nan ta preocupa pa e normanan di petroleo, no di politica.
Mas di 40 nacion, incluyendo Merca, e potencianan Europeo y e mayor parti di America Latino, a reconoce e lider opositor Juan Guaido como hefe di estado legitimo.
E solicitud a bay den un carta manda pa secretario general di OPEC, Mohammad Barkindo, fecha dia 29 di januari y Reuters a haya esaki pa mira.
“Nos pais ta spera di ricibi e solidaridad y apoyo total di e paisnan miembro di OPEC y su Conferencia ministerial, den e bataya cu nos tin actualmente contra e intrusion ilegal y arbitrario di Estadonan Uni den e asuntonan interno di Venezuela,” Maduro a skirbi.
OPEC ta trata di evita disputa politico cu ta involucra miembro individual. Aña pasa a rechasa un solicitud di Iran pa discuti e sancionnan di Estadonan Uni contra Teheran den un reunion encuanto establecimento di politica.
Venezuela un tempo tabata un di e tres productornan mas grandi di OPEC, pero su industria ta den un caida den e collapse di economia di e pais. Hunto cu Libia y Iran Venezuela ta exento di e ultimo corte di suministro, lidera pa OPEC, pasobra nan produccion ta sigui cay di tur manera.
