Presidente de facto Nicolas Maduro a acusa diamars pasa Asamblea Nacional y gobierno di Donald Trump di a horta 1.300 miyon dollar di Citgo, e filial di Pdvsa na Merca.
“Gobierno di Merca a apropia ilegalmente di Citgo y nan ta endeudando esaki cu 1.300 miyon dollar, cu complicidad di Asamblea Nacional (controla pa oposicion),” Maduro a bisa na palacio presidencial Miraflores na Caracas.
El a sigura cu al menos 10 % di e placa ey “ ta yega na saco di e diputadonan ladron di Asamblea Nacional.”
“Ta un crimen loke nan ta haciendo cu Citgo, nan ta haciendo negoshi 1.300 miyon dollar nan ta hortando awe, na e ora aki, cu complicidad di gobierno di Merca,” el a reitera.
Na januari, algun dia despues cu e lider opositor Venezolano Juan Guaido a huramenta como presidente interino, logrando reconocimento di Washington, Estadonan Uni a impone sancion riba Psvsa cu tabata inclui e blokeo di e fondonan di Citgo, cu e obhetivo pa traspasa nan despues eventualmente na un gobierno nobo.
Ademas, Guaido, presidente di parlamento Venezolano, a tuma control di Citgo cu apoyo di Washington y a designa un directiva alternativo presidi pa Luisa Palacios.
Maduro a reitera cu e accionnan ey ta “ilegal.” “Asina nos lo demostra ora nos bay gana e huicionan na Merca y cu nan mester debolbe nos e empresa Citgo, propiedad di estado Venezolano,” Maduro a adverti.
