E politiconan opositor Maria Corina Machado, Antonio Ledezma y Diego Arria a bolbe manifesta nan desacuerdo cu e intento di mediacion di gobierno di Noruega pa haya un solucion pa e crisis Venezolano, y a reitera nan posicion cu mester haci uso di forsa pa termina cu e dictadura di Nicolas Maduro.
Den un carta publico e politiconan a haci un yamado na presidente interino Juan Guaido pa cancela y cera e negociacion, cu na nan opinion lo ta dañino.
Machado, Ledezma y Arria a adverti encuanto “ e posibilidad cu di un pacto cu crimen organisa lo por surgi ‘eeccion democtratico’ cu ta celebra bao di nan dominio.”
“Abo, señor Presidente, a insisti den ripiti cu, pa loke ta e regimen, tur opcion ta riba mesa. En realidad, riba mesa ta keda un solo y unico opcion real. Eopcion ey ta forsa, comprendi como e combinacion apropia di forsa institucional di Asamblea Nacional, di su Presidencia Interino y di e Tribunal Supremo di Husticia legitimo, cu e forsa di e mobilisacion organisa di e Venezolanonan y e forsa di un coalicion internacional leal, cu ta coopera cu nos den e tarea di desaloha e narcoestado imperante, libera Venezuela y reconstrui e Republica. Nos ta pidi bo pa asumi e realidad aki,” e carta ta bisa.
E dirigentenan opositor a mandaa e carta riba mesun dia cu Nicolas Maduro a lansa un menasa serio contra Guaido, bisando cu e presidente interino no lo tuma poder “ni por las malas ni por las buenas”. Maduro a haci su discurso diamars pasa celebrando e di dos aniversario di Movimiento Somos Venezuela, cu maduro a crea banda di e partido oficial PSUV.
