Presidente di Mexico, Andres Manuel Lopez Obrador, a afirma ayera cu su pais tin “porta habri” pa brinda mediacion den e crisis Venezolano, despues cu presidente Venezolano Nicolas Maduro a pidi pa reanuda e asina yama ‘mecanismo di Montevideo’.
E mecanismo ta consisti di e paisnan cu ta simpatisa cu Maduro: Bolivia, Mexico, Uruguay y 14 pais di Caricom. E ultimonan aki tabata beneficia di petroleo na prijs preferencial di Venezuela a traves di e iniciativa PetroCaribe.
E presidente Mexicano a reitera cu su pais ta propone pa e partidonan sinta pa dialoga. “Esaki ta lo miho, e ta busca un salida pacifico den e conflicto na Venezuela,” el a indica. Tambe el a splica cu e criterionan di politica exterior di Mexico ta pa busca solucion pacifico den cualkier controversia.
Pero el a adverti cu pa logra dialogo mester tin “aceptacion di e grupo opositor.” .
“Tur dos banda mester solicita esaki. Pidi, y nos lo yuda. Ya nos a bisa caba cu na Mexico tin bon diplomatico y incluso a papia caba di intermediacion di diplomatico,” Lopez a indica.
Di e manera aki, e presidente a opina cu lo ta positivo si usa Mexico como lugar di dialogo.
“Den e pais aki a firma acuerdo di paz di El Salvador y tambe tabatin encuentronan pa busca salida negocia, no violento, den conflicto,” el a señala.
Sin embargo, oposicion di Venezuela, lidera pa presidente di Parlamento, Juan Guaido, a bisa na varios oportunidad cu lo dialoga solamente si Maduro sali di poder, pasobra ta considera cu e mandatario ta “usurpando” presidencia despues di gana eleccion considera fraudulento.
