Gobierno di Spaña a confirma ayera entrada na Spaña di Lilian Tintori y su yiu chikito, despues cu e casa di e lider opositor Leopoldo Lopez a dicidi di sali di Venezuela. “Tanto Lilian Tintori, como su yiu ta den perfecto estado,” e comunicado oficial ta bisa.
Tintori y su yiu a sali di e residencia di e embahador Spaño na Venezuela, unda nan a busca refugio hunto cu Lopez despues cu el a logra haya su libertad y a participa den e intento di rebelion militar contra regimen di Nicolas Maduro dia 30 di april recien pasa.
E comunicado no ta revela detaye encuanto Lopez, cu ta kedando den residencia di e embahador Spaño na Caracas, ni di e otro dos yiu di e matrimonio.
Husticia Venezolano a ordena detencion di Lopez despues cu el a keda libera di su aresto domiciliario pa militarnan cu a deserta, pero gobierno Spaño a responde cu no ta entrega e lider opositor y for di e momento ey e situacion a keda asina.
Deteni na 2014, e politico tabata cumpli desde 2017 prizon domiciliario a base di un condena na casi 14 aña di prizon, acusa di incita protesta violento contra gobierno Chavista.
Leopoldo Lopez Sr., su tata, ya tin residencia na Madrid y na 2016 a haya nacionalidad Spaño bao di gobierno conservador di Mariano Rajoy. Hunto cu e partido di Rajoy el a caba di bira diputado den Parlamento Europeo.
E capital Spaño a bira e destino di varios otro opositor contra gobierno di Nicolas Maduro, manera ex-alcalde di Caracas, Antonio Ledezma.
