(LaPatilla) – E inhabilitacion politico no ta obstaculo pa participa den e primaria presidencial opositor di dia 22 di october, pero si den e eleccion presidencial di 2024. Den e sentido ey, sin ricibi contesta concreto for di oposicion, hopi ciudadano ta puntra: kico oposicion mester haci den caso cu un candidato inhabilita gana e primaria?
Consulta pa Voz de America, e politologo di Universidad di Carabobo y director strategico di Politiks, Enderson Sequera, ta considera cu den caso cu un candidato inhabilita gana e eleccion primaria, e mester lidera, hunto cu e resto di oposicion, “un proceso di presion nacional y internacional destina na restitui e condicionnan electoral den e eleccion presidencial.”
Sequera ta referi na e condicion- y recomendacionnan documenta den e rapport final di e Mision di Observacion Internacional di e Union Europeo (MOE UE) despues di e eleccionnan regional den 2021.
E tempo ey, MOE, entre otro cos, a observa e deficiencianan structural como tambe e falta di seguridad huridico y a formula diferente recomendacion, entre nan e reforsamaneto di e separacion di podernan y suprimi e privilegio di e CGR di kita for di e ciudadanonan nan derecho fundamental na momento di presenta na e eleccionnan.
Den e supuesto caso cu tur candidato resulta inhabilita, Sequera ta considera cu e opcionnan di oposicion ta defini un candidato pa mecanismonan alternativo manera e consenso, of plantia un strategia di presion nacional y internacional.
Pa Luis Peche, consultor politico di e Universidad Camilo Jose Cela y internacionalista di e Universidad Central di Venezuela (UCV) ambos scenario ta riba mesa y no tin garantia cu e chavismo no lo ripiti loke a sucede na Barinas, ora cu e candidato di oposicion, Freddy Superlano, a resulta inhabilita despues di gana e gobernacion di e estado ey na 2021.
“E oposicion mester ta prepara pa un scenario cu no ta depende solamente di un cara pero si no di un causa democratico pa recupera e institucionalidad,” el a afirma.
