Delcy Rodríguez, presidente di Asamblea Nacional Constituyente di Venezuela a bisa cu Venezuela no tin manera pa paga carga di cuminda y medicina, cu ta biniendo riba barco y cu awor  ta situa na costa cerca di e pais aki, pa motibo di e decreto cu presidente di Merca, Donald Trump a firma diabierna cu a pasa.

“Nos tin barco na costa cerca di Venezuela, cu ta carga cu medicina y cuminda, pero Venezuela no tin opcion pa paga e cargamento cu poblacion di Venezuela mester. Dicon?  Pasobra Venezuela tin un blokeo financiero,” Rodriguez a declara den un audiencia di e comision di berdad di Asamblea Nacional Constituyente.

E ex-canciyer a bisa cu e decreto cu Trump a firma diabierna cu a pasa “ ta formalisa e blokeo financiero contra Venezuela.” Segun Rodriguez e decision aki ta busca pa blokea tur pago internacional cu Venezuela mester haci, cu obhetivo di haci e atake economico contra e pueblo Venezolano mas fuerte.”

Diabierna, presidente di Merca a firma un orden ehecutivo, cu ta prohibi negociacion di un algun debe nobo y di capital emiti pa gobierno di Venezuela y PDVSA, como parti di algun sancion contra sistema financiero di Venezuela.

E medida cu a ser anuncia pa Cas Blanco den un comunicado, den cual ta prohibi tambe e negociacion di algun bono cu e  sector publico Venezolano, como tambe pago di dividendo na gobierno di Venezuela”.

Rodriguez ta bisa cu e sancion financiero no ta afecta gobierno, pero si ta afecta e  pueblo Venezolano. El a bisa cu gobierno di Venezuela ta prepara un respuesta financiero “reciproco” en bista di e “blokeo financiero” di Merca.

El a culpa tur grupo di oposicion di tur sancion cu Merca a impone riba  e pais aki, y el a bisa cu oposicion a pidi e sancion aki pa Venezuela.

Venezuela tin un crisis di falta di medicina y cuminda pa mas di 3 aña, cuminda manera hariña di trigo, di maishi, azeta, sucu y otro. Merca a comunica sancion financiero tambe contra funcionarionan di Venezuela, como medida di presion riba Caracas, despues cu gobierno a instala e Asamblea Nacional Constituyente, un organo cu e ta considera ilegitimo y cu ta e motibo cu a origina e uso di e denominacion ‘dictadura’ pa Venezuela.