Presidente di parlamento Venezolano, Juan Guaido, tambe reconoci como presidente interino di su pais pa sigur 50 gobierno, entre nan esun di Brasil, a ser ricibi na palacio Planalto pa Jair Bolsonaro, presidente di Brasil.
Bolsonaro a afirma cu su gobierno lo no stop cu e buskeda di “loke e Venezolanonan ta desea: democracia y libertad.”
Den un declaracion conhunto despues di un reunion priva, e hefe di estado Brasileño a declara cu Guaido, reconoci como presidente interino di Venezuela pa Brasil, ta “un speransa den e proceso di recuperacion di democracia y libertad.”
Guaido a participa tambe den un encuentro cu decenas di embahador di pais, cu manera Brasil, ta reconoce Guaido como presidente di Venezuela.
Despues di e encuentro cu Bolsonaro, tabatin programa un bishita ma sede di parlamento Brasileño, unda Guaido a papia cu autoridadnan di tanto Camara di Diputado como Senado.
No ta conoci ainda ki plan Guaido tin despues di su bishita na Brasil. Asamblea Nacional a autorisa Guaido pa keda den exterior pa mas di cinco dia, pa cual ta pensa cu e lo por ta bishita mas paisdi e continente. Entre otro lo tin invitacion di gobierno di Chile pendiente.
Brasil ta miembro di e Grupo di Lima, di paisnan Americano cu ta exigi salida di Maduro di poder y cu dialuna a tene un reunion na Bogota, cu presencia di Guaido, den cual a reitera e voluntad di traha pa regreso di democracia na Venezuela. Tambe e Grupo a rechasa un intervencion militar na Venezuela y ta enfatisa e importancia di eleccion liber, bao supervision internacional.
