Presidente di parlamento, y presidente interino di Venezuela, Juan Guaido, ta bishita Brasil awe pa conversa cu presidente Brasileño Jair Bolsonaro, segun fuentenan cerca a confirma pa agencia noticiero EFE.
Di acuerdo cu representantenan di Guaido na Brasilia, ta programa pa e reuni cu e mandatario di Brasil, ken a mantene apoyo decisivo y firme pa Asamblea Nacional di Venezuela, di mayoria opositor, desde cu na januari pasa a declara presidente de facto Nicolas Maduro “usurpador” di poder.
E agenda completo di Guaido na e capital Brasileño, di acuerdo cu e fuentenan consulta pa EFE, ainda “ta den preparacion”, pero por inclui ademas un bishita na sede di Congreso.
Ayera Guaido a publica un mensahe na Twitter pa specifica e ruta di accion pa sigui. “Mi kier anuncia mi regreso pa Venezuela sabiendo cu henter un pais ta dispuesto di sigui pasobra nan sa cu, contra tur dificultad, si nos no stop, nos ta bay bon.”
“E opresor (Nicolas Maduro) a scoge e pio caminda y te awe mi ta kere cu su sadismo no lo ta suficiente pa contene un pueblo cu sa cu e ta su so. Ta asesino so ta defend’e y criminalnan paga,” el a continua.
Por ultimo,el a convoca a un mobilisacion pa e dia di su regreso na Venezuela: “Mi lo anuncia, den e proximo dianan, e dia di nos regreso pa boso acompaña nos den e proceso di mobilisacion nacional pa demostra cu nos ta mayoria, cu nos ta mobilisa, cu nos tin capacidad y cu nos no ta bya bandona caya te cu nos logra e fin di e usurpacion, e gobierno di transicion y naturalmente, eleccion liber.”
