Segun agencia noticiero Bloomberg, Iran ta hayando pago cu oro pa su asistencia den e crisis di gasolin actual na Venezuela. A traves di e aerolinea Irani Mahan Air lo a yega un lote di aditivo, piesa y tecnico pa reorganisa y reanuda produccion di gasolin na e pais.
Di otro banda, funcionarionan di e regimen di Maduro lo ta entregando varios tonelada di oro valora na miyones di dollar na Iran pa sali di e problema di gasolin na Venezuela, cu ta trancando gran parti di su economia.
Segun un reporte di Bloomberg, ta trata di nuebe tonela di oro cu valor di alrededor di US$ 500 miyon, cu a bay pa Teheran den un intento di soluciona e crisis di combustible na e pais.
E aerolinea usa pa esaki, Mahan Air, por medio di mas di 12 vuelo den aproximadamente un siman a hiba pa Venezuela aditivo, piesa y tecnico pa pone un di e refinerianan di Venezuela back den operacion y produciendo gasolin, pa cual ta necesario dispone di proceso di ‘catalytic cracking’.
Segun Bloomberg, sin placa en efectivo y desespera pa logra ayudo pa reinicia su industria petrolero, Venezuela ta lagando su reservanan di oro na un minimo y ta entregando esaki na su aliado ideologico, di acuerdo cu fuente na altura di e asunto.
E cargamento di oro manda pa Iran a causa un bahada fuerte den e reservanan di oro publica na Venezuela y a laga e pais, devasta economicamente, cu solamente US$ 6.300 miyon na activo den moneda fuerte, e cantidad mas abao den tres decada.
E dos paisnan, considera paria den circulonan internacional – ta trahando mas estrechamente den nan intento pa resisti e sancionnan imponi pa Merca y e collapse di prijsnan di petroleo, siendo cu pa ambos benta di crudo ta nan principal entrada. Pa Iran, e acuerdonan cu Venezuela ta duna un fuente nobo di entrada. Pa Venezuela, esaki ta sigura cu su suministro di gasolin no ta caba totalmente.
