E fiscal general nombra pa e asamblea constituyente Chavista, Tarek William Saab, a informa ayera cu ministerio publico, na su encargo, a inicia un investigacion contra presidente encarga di Venezuela, Juan Guaido.
E regimen di Nicolas Maduro a habri e proceso aki vinculando Guaido cu un supuesto sabotahe di e sistema electrico nacional.
“Poco ora despues di e hecho lamentable di e sabotahe electrico, hamas visto den historia di e republica, Guaido a publica un tweet den cual el a menciona cu luz lo bolbe cu e final di e usurpacion (di poder di Maduro),” asina Saab a expresa.
Esaki no ta un hecho casual, sino cu e ta añadi na un cantidad di evento desde e auto proclamacion no reconoci pa hopi pais, cu inicialmente a aproba esaki, Saab a agrega.
E fiscal constituyente a detaya cu e investigacion ta bay hunto cu esun inicia dia 29 di januari, tempo cu el a solicita Tribunal Supremo diHusticia imposicion di medida di precaucion, pasobra “ e ciudadano aki a desacredita nos di manera publico y notorio, haciendo burla di e sistema di husticia di Venezuela, di e institucionnan democratico.”
Ola di sakeo na Zulia
Decenas di tienda na Maracaibo a keda sakea desde diadomingo pasa, den e crisis di electricidad, cu tin e region di petroleo aki cinco dia caba sin luz. Dialuna anochi ainda e sakeo tabata continua.
Gruponan violento tabata drenta den panaderia, supermercado, tienda di aparato electrico, zapateria, joyeria, centronan comercial y tabata sali cargando loke nan por a hiba.
Varios testigo a conta EFE cu e sakeadornan tabata actua den grupo y hasta a enfrenta miembronan di Guardia Nacional na algun ocasion, sin cu tin noticia di herido o morto.
Luz na Zulia a cuminsa bolbe dialuna anochi, cu interupcion, despues di mas di 100 ora continuo sin luz y gran parti di Maracaibo tabata sigui ainda den scur.
Na otro estado tambe tabatin sakeo, manera na Anzoategui, Merida, y na Baruta, zona di Caracas, segun autoridadnan a informa agencia EFE.
