Venezuela ta e pais cu e velocidad di internet mas abao riba continente Americano, segun medicion di un empresa Mericano specialisa den diagnostico tecnologico. Expertonan di e materia ta adverti cu e comunidadnan mas aleha di capital Caracas tin mas problema pa drenta na internet.
E periodista specialisa den informatica, Fran Monroy, a splica cu, segun medicion di e firma OOKLA, e promedio mundial di velocidad di internet ta 22 megabits pa seconde.
“Nos tin un promedio di 3 megabits pa seconde cu, segun norma internacional di telecomunicacion, nos ta bao di e definicion di broadband. E siguiente ta Haiti (3.5) y despues Paraguay (4),” Monroy ta splica. Na Latinoamerica, e pais cu miho prestacion ta Uruguay, cu 12 megabits pa seconde.
E specialista tambe a detaya cu den ultimo cinco aña Venezuela a perde como 32 % di su usuarionan cu ta conecta a traves di telefonia mobil, pa e prijsnan impagable di celular.
“Mas leu bo ta di Caracas, mas fayo den conectividad y stabilidad bo ta haya. Tin sitio unda e conexion ta solamente 2G. Es decir, conexion mobil di dato ey ta inexistente,” segun Monroy.
Nicolas Maduro, a anuncia cu e luna aki lo pone e plan “Fibra optica al hogar” den operacion, pa hiba internet di alto velocidad pa tur estado, pero te awor no a implementa nada. “Nos ta bay avansa den implementacion masal di tecnologia 4G y 5G cu ta bay instala na Venezuela,” e lider Chavista a bisa.
Activistanan pa derecho digital a adverti cu Venezolanonan no mester lidia solamente cu un internet di mal calidad, sino tambe cu blokeo di parti di estado di medionan di comunicacion y rednan social.
“Nan no ta blokea paginanan informativo di evento importante so, sino tur streaming di oposicion riba YouTube, Instagram o Twitter. Pa oranan largo. Nan tin oficina sofistica dedica na esaki tur dia,” asina Luis Carlos Diaz, defensor di derecho digital, ta afirma.
