(ElNacional) – E cartelnan di droga Mexicano a extende nan rednan na America Latino, tambe den e caso di Venezuela. Sin embargo, tin un cambio den e forma di opera. Envez di pone nan propio celnan clandestino na otro pais, nan a opta pa un strategia mas practico: crea alianza cu gruponan local y di e manera ey opera cu menos visibilidad y cu rapidez.
Den e caso di Venezuela, InSight Crime a documenta na 2020 e presencia di Cartel di Sinaloa na estado Zulia. Segun e organizacion, e presencia di e organizacion narco Mexicano a crece te tal punto cu “ta existi un pueblo den e estado cu a keda bautiza di nobo cu e nomber Sinaloa.”
Den algun caso, manera na Colombia y Venezuela, e alianzanan tin mas raiz, cu e negoshi penetra den e aparato di seguridad y gobierno, segun e investigacion di Grupo de Diarios America. E gruponan cu cual nan ta vincula tin nomber y fam: e disidencia di Farc, Clan del Golfo, y guerrilla di ELN. Na Venezuela nan ta liga cu e asina yama Cartel de los Soles, vincula na militarnan halto. Ambos organizacion guerrillero Colombiano menciona ademas ta ser acusa di operacion den teritorio Venezolano, sin intervencion contra nan di parti di gobierno y ehercito Venezolano. Ta considera e Cartel di Sinaloa esin cu mas poder y mas contacto na e region, sigui di cerca pa Cartel Jalisco Nueva Generacion.
Gobierno Mexicano ta considera e cartelnan menciona e dos organizacionnan mas importante na Mexico, cu operacion internacional y cu rednan na America Latino, Merca y Europa.
E poder di e cartelnan ta asina grandi cu nan a interveni den e conflicto entre Farc y ELN, cu tabata causa perdida miyonario na nan negoshi, trancando e transport di cargamento di droga.
