(LaPatilla) – Inflacion na Venezuela ta sigui den aumento, alcansando un cifra preocupante di 8.5% den luna juni di 2023, den comparacion cu e cifra di 7.6% registra den luna di mei.
E cifranan aki ta un indicativo cla cu e proceso di inflacion ta persisti a pesar di e intentonan pa stabilisa e tipo di cambio, segun un rapport di Observatorio Venezolano di Finansas (OVF).
Den terminonan anual, e cifra di inflacion ta situa na 429%, loke ta laga den evidencia e magnitud di e problema economico cu e pais ta enfrenta.
Ademas, inflacion acumula ta ubica na un 100.8%, loke ta nifica cu e prijsnan a aumenta mas cu dobel den e transcurso di un aña.
E rapport ta señala cu prijs di sector di servicio a experimenta un aumento di 19.5% den luna di juni.
E aumento aki tabata impulsa pa e costonan mas grandi di electricidad, servicio di telefon y colecta di sushi.
Di su banda, e sector di transporte a registra un aumento di 9.1%, educacion un 8.0% y alimento un 7%.
Relaciona cu e tipo di cambio, e bolivar a experimenta un aumento di 6.5%, compara cu e dollar durante luna di juni. Asina mes, e base monetario a aumenta un 12.4%.
E data aki ta sugeri cu e expansion monetario cu ta ser realisa pa Banco Central di Venezuela (BCV) ta generando presion ariba e tipo di cambio y, consecuentemente ariba e prijsnan.
Mirando e situacion aki, e agentenan economico ta buscando pa deshaci di e moneda nacional debi na e efectonan di inflacion den pasado y e expectativanan di un devaluacion di e bolivar den futuro.
E falta di confiansa den e stabilidad economico di e pais a hiba na un demanda creciente di moneda stranhero, loke na su turno ta contribui na e devaluacion di e moneda local.
