E empresa di India, Reliance Industries Ltd, operador di e compleho di refinacion mas grandi di mundo, a declara diaranson pasa cu a suspende suministro di diluyente na Pdvsa, y a afirma cu no lo reanuda esaki te cu lanta e sancionnan Mericano. Reliance Industries Ltd, ta di e di cuatro compleho di refineria mas grand di mundo.
Gobierno Mericano ta preparando pa impone den e proximo dianan, sancion “significativo” contra institucionnan financiero cu ta haci negoshi cu gobierno di Nicolas Maduro, segun e delegado special di Merca, Elliott Abrams.
Pdvsa tabata importa aproximadamente 100.000 bari diario di nafta, principalmente di Merca, pa mescla cu 400.000 bari di crudo extra pisa y haci esaki explotabel. E filial cu sede na Houston di Reliance tabata suministra diluyente na Venezuela. E medida ta obliga Venezuela busca alternativa pa compra di diluyente.
Reliance, un consorcio di India controla pa e multimiyonario Mukesh Ambani, tin un importante exposicion na e sistema financiero di Merca, unda tin algun subsidiario ta opera, cu ta den negoshi di petroleo y telecomunicacion. Entre otro.
Reliance no a aumenta compra di petroleo di Venezuela, e compania a contesta riba e-mail di Reuters cu tabata busca comentario riba e asunto.
Den otro noticia, e cifranan di februari di OPEC pa loke ta produccion di crudo ta mustra cu tabatin un caida pronostica di produccion total di e cartel, di 221.000 bari pa dia, yegando na 30,54 miyon bari pa dia. Di e caida di produccion mas di mita lo ta pa e caida na miembro Venezuela, unda produccion a cay cu 142.000 bari pa dia, compara cu januari 2019.
