(ElNacional) – E ex-militar Chavista Hugo Carvajal, di paradero desconoci desde 2019, a reaparece y ta denuncia “persecucion” contra su persona na Spaña, pa cumpli cu sentencia di extradicion pa Merca.
E ex-general experimenta den asunto di inteligencia a desaparece na 2019 despues cu un tribunal Spaña a aproba su entrega na autoridadnan hudicial Mericano. Ta acusa Carvajal di narcotrafico, labamento di placa y colaboracion cu Farc pa hiba droga pa teritorio Mericano.
Ayera Carvajal, ainda di paradero desconoci, a denuncia “iregularidad grave di parti di Husticia y di gobierno di Spaña den un proceso di extradicion y ta denuncia un “intromision politico” den husticia Spaño. Carvajal a bisa den e comunicado difundi via Twitter, cu e alegacion cu e ta bao proteccion di gobierno Spaño ta falso y a afirma cu el a kiboca tempo cu el a opta pa Spaña pa su “exilio” pa desde exterior acciona contra Nicolas Maduro. “Leu di protege mi, gobierno Spaño a comete iregularidad grave contra mi,” el a subraya.
Al respecto, el a recorda cu Audiencia Nacional Spaño (tribunal supremo di Spaña) a cambia “bao di circunstancia straño” nan postura contrario inicialmente pa cu extradicion. E ex-general a indica cu embahada di Spaña na Merca a contact hueznan di Audiencia Nacional pa nan bay di acuerdo cu extradicion pa Merca.
E tribunal a rechaza aña pasa suspension di e extradicion, cu tabata aproba pa gobierno despues di autorisacion di Audiencia Nacional, cu a rechaza un peticion di e abogadonan di Carvajal, cu a alega cu e acusacionnan no tabata berdad y cu e unico meta cu Merca lo tin ta pa tortura Carvajal pa haya informacion encuanto Venezuela.
