Un hues femenino di e Sala Contitucional di Tribunal Supremo di Husticia (TSJ) di Presidente Maduro, Carmen Zuleta de Merchan, a bisa diasabra pasa cu e reciente informe tocante Venezuela di Alto Comisionado di Nacionnan Uni pa Derecho Humano, Michelle Bachelet, ta “victimisa” muhenan di e pais, cu ta opta pa prostitui nan mes y cu nan no ta forsa pa haci esey.
“E Informe di Bachelet ta enfatisa e muhenan pa victimisa nan sentimentalmente (…) muhenan di Venezuela ta doño di nan propio destino y ora nan opta pa prostitui nan mes (manera na tur parti di mundo) ta pasobra nan ta p…,” De Merchan a pone riba su cuenta na red social Twitter.
Den e informe menciona di Nacionnan Uni, ta indica cu e muhenan Venezolano den e prizonnan di e regimen di Maduro a haya nan mes obliga pa intercambia sex pa cuminsa o pa haya algun privilegio den e institucion.
“Fuentenan local a reporta algun caso di muhe cu a haya nan mes forsa pa intercambia cuminda pa sex.” e informe ta señala den e seccion di “Derecho riba alimentacion”. Den e seccion dedica na “Detencion Arbitrario, Tortura y Maltrato,” ta splica cu e centro di detencion di servicio di inteligencia Sebin no ta adapta “pa cumpli cu e standardnan specifico di genero,” conclusion na cual a yega despues di entrevista cu varios muhe cu tabata deteni ey, cu a informa cu nan tabata cera hunto den e unico cel pa hende muhe, cu tabata completamente sobrepobla y vigila principalmente pa hende homber.
Opinion di e hues a causa hopi protesta y comentario, entre otro di Avesa (Asociacion Venezolano pa Educacion Sexual Alternativo) un ONG specialisa den derecho sexual, reproductivo y di hende muhe.
