(ElNacional) – E eleccion primario opositor, cu ta wordo celebra dia 22 di october, ta un oportunidad di legitimisa e liderazgo y restructura e unidad pa enfrenta e regimen di Nicolas Maduro durante e eleccion presidencial di 2024. Asina e hobennan di e partidonan politico opositor, ken ta asumi e importancia di e rol cu e hubentud ta hunga den e escenario politico nobo.

Evelyn Pinto, Jesus Mendoza, Luis Palacios, Carlos Fernandes y Victor Zambrano, secretarionan hubenil di Accion Democratica, Fuerza Vecinal, Primero Justica, Vente Venezuela y Encuentro Cuidadano, respectivamente, ta aspira pa esaki ta u proceso inclusivo, di altura y transparencia, den marca cu e respet pa e adversario y den cual por consolida e unidad.

“E hubentud no ta kere den e liderazgo imponi; nan ta kere den e liderazgo cu ta legitimo pa e basenan di e pais aki y e miho oportunidad pa haci esey ta e eleccion primario. Nos mester confirma e liderazgo di oposicion pa enfrenta cu hopi mas forsa e regimen di Maduro den 2024,” Carlos Fernandes a expresa.

Den su opinion, e participacion activo di e hobennan den e eleccion primario ta bay sirbi pa duna mas legitimidad na e proceso. “Nos mester kere den e proceso aki y traha pe, pa e pais wak cu e hubentud tambe ta hinca completo den e eleccion primario,” el a señala.

Victor Zambrano a considera cu mester probecha e proceso manera un forma di union, trabou y di loke oposicion ta capaz di haci y transforma cu bista riba 2024. “E proceso aki ta un etapa pa sigui traha pa loke semper nos a lucha p’e,” el a manifesta.

Evelyn Pinto y Jesus Mendoza ta coincidi den resalta e necesidad pa e eleccion primario ta un espacio inclusivo, den cual tur opositor cu kier wak un cambio por participa. Ademas, nan ta destaca e importancia di mantene e respet entre e candidatonan.

“Nos ta spera cu e ta un proceso transparente, cu ta den marca cu e respet, y cu nos por tin exito politico, cual ta loke nos tin mester realmente. Esaki ta un di e procesonan mas importante riba nivel politico cu nos ta bay biba pa e eleccion presidencial di 2024,” Mendoza a menciona.

E hobennan opositor a reconoce e indiferencia cu ta existi di parti di e hubentud di e pais pa loke ta trata, no solamente e proceso di eleccion primario, sino tambe pa e procesonan electoral en general.

“E berdad ta cu no ta cu e hobennan ta rechasando e eleccion primario, e cos ta cu e hobennan despues di e ultimo seis añanan ta rechasa e politica como un espacio pa expresa nan boluntad y nan gana di sigui traha pa e publico,” Luis Palacios a argumenta.

Den su opinion esaki ta consecuencia di un regimen cu a construi un sistema cu ta fastidia e hubentud y ta expresa negatividad den oportunidadnan den e politica. Esaki, el a continua, ta haci cu e hobennan ta opta pa e sobrevivencia general cu ta biba na e pais.