Venezuela ta cera aña den materia economico cu e indice mas halto di hiperinflacion na mundo, den un situacion economico unda dollar a tuma lugar di e bolivar, cu a practicamente desaparece y e bononan di regimen di Nicolas Maduro a haci bida di pensionado y empleadonan publico un calvario.
Na 2019 inflacion no a yega na loke tabata proyecta, mas di 10 miyon %, pero ainda lo ta por lo menos 200.000%, segun Fondo Monetario Internacional (IMF). Suficiente pa caba cu valor real di e bolivar, cu a termina aña na mas di 55.000 pa un dollar.
E produccion minimo di petroleo y producto deriva, y e fayonan den suministro di coriente ademas di e poco apertura cu tin pa inversion stranhero ta mantene su economia sin perspectiva di mehora. Un di e problemanan mas grandi pa e Venezolanonan tabata e pesimo ‘desempeño’ di e servicionan publico: awa, gas, gasolin.
Di parti di prensa comprometi cu e regimen ta trata di presenta e dolarisacion como algo cu ta sucede tur parti di mundo como algo logico pa motibo di e peso di e dollar den economia mundial. Sin embargo, esaki ta ignora e papel di divisa stranhero en general, cu si tin valor compara cu e bolivar cu a bay atras asina hopi y rapido, cu e no tin uso mas como instrumento di pago.
Desde e momento ey, economia di e pais a cambia completamente, pero “pa pio” debi cu e salarionan ta na bolivar pa e empleado publico, manera constitucion ta bisa, mientras gran parti di e personanan di edad halto no tin cuenta di banco o no ta ricibi placa di exterior na dollar.
Cu consecuencia cu un parti chikito di e poblacion ta sobrevivi riba divisa cu ta ricibi di exterior, mientras e masa grandi no tin acceso na moneda di valor real.
