Diputado di Comision di Finanzas di Asamblea Nacional, Angel Alvarado, a revela cu e cifra di inflacion pa luna di augustus a aumenta te na 65,2%.
Alvarado a indica cu e inflacion acumula, entre januari y augustus 2019 ta 2.674%, mientras cu e contraccion di economia tabata di 43%, compara cu e prome trimester di 2018.
“E prijsnan no a para y e contraccion economico ta hopi profundo, pasobra cu e salario minimo por cumpra solamente 2% di e canasta alimentario, midi pa Asamblea Nacional,” segun Alvarado.
Cu inicio di aña escolar na bista, e diputado a calcula cu hopi mayor lo mester “inverti” 33 salario minimo pa haya e lista di material escolar necesario.
Augustus tabata un luna duro pa cartera y stoma di e Venezolanonan. E luna ey prijsnan a registra aumento cu ta duplica esunnan di luna di juli, unda tabatin un reduccion di e inflacion te na 33% den mercado municipal di Quinta Crespo. E aumento di prijs di alimento basico tabata varia entre 12 % y 354 % den menos di un luna.
Entre e productonan mas costoso tin esunnan cu ta contene proteina (carni, keshi, etc.) cu ta varia entre 68.000 y 36.000 bolivar pa kilo, cu aumento di te 39.000 bolivar entre 2 y 31 di augustus. “E prijsnan ta subi cu lift,” tabata e expresion di Felicita Juarez, ama di cas di Caracas. Ayera dollar paralelo na Caracas tabata alrededor di 20.900 bolivar.
Aunke e demanda di alimento ta cada vez menor, na Caracas e prijsnan no a stop di subi. Actualmente, un kilo di keshi geel por costa entre 85.000 y 250.000 bolivar, entre 2 y 6 salario minimo, segun oferta di e cadenanan di supermercado y mercado di Quinta Crespo.
