E abogado Roberto Marrero, hefe di despacho di presidente encarga Juan Guaido, a keda deteni den marduga di ayera pa forsanan di seguridad di estado.
Funcionarionan di Servicio bolivariano di Inteligencia (Sebin) a invadi residencia di Marrero, como tambe vivienda di diputado di Asamblea Nacional, Sergio Vergara, ken ta funciona como hefe di e fraccion parlamentario di partido Voluntad Popular.
Marrero a denuncia cu durante e invasion a pone dos fusil y un granada den su cas y cu e Prome Tribunal di Terorismo a hiba e procedimento, a cargo di hues Carol Padilla, y fiscalnan Farik Mora y Dinorah Bustamante.
Ecanciyer di Colombia, Carlos Holmes Trujillo, a rechasa e atake di e funcionarionan di Sebin riba e representantenan di Guaidoy a haci un yamado na comunidad democratico internacional pa “exigi respet pa nan libertad, bida y integridad.”
“Estadonan Uni ta condena e invasionnan haci pa servicio di seguridad di (Nicolas) Maduro y e detencion di Roberto Marrero, hefe di despacho di presidente interino @jguaido”, secretario di Estado, Mike Pompeo, a pone riba su cuenta di Twitter.
“Nos ta pidi su liberacion inmediato. Nos lo exigi responsabilidad di esnan involucra” den e aresto, el a agrega.
Di comunidad internacionala bin varios reaccion riba e aresto di Marrero. E senador Mericano Marco Rubio a declara cu e aresto di Roberto Marrero ta un aumento significativo di represion y por indica e comienso di e esfuersonan pa aresta Guaido mes.
Secretario general di OEA, Luis Almagro, a afirma cu e regimen mester stop cu su crimennan. “Ya no mas violacion di libertad y di rehen, nos debe pueblo di Venezuela libertad como comunidad internacional,” el a expresa a traves diTwitter.
Ministro di Husticia y Interior, Nestor Reverol, a declara cu servicio di inteligencia “a desmantela un biaha mas un cel terorista cu tabata planifica un conhunto di atake selectivo y pa esey a contrata mercenario Colombiano y Centroamericano.”
Nan obhetivo lo tabata, segun Reverol, atenta contra bida di lidernan politico, militar, magistradonan di Tribunal Supremo y “haci acto di sabotahe na servicionan publico pa crea caos den sociedad Venezolano.”
