ORANJESTAD – Trafico aereo y maritimo por continua entre Venezuela cu Aruba, Corsou y Boneiro awor cu Reino a firma un acuerdo diasabra cu Venezuela.
Minister di Asuntonan di Exterior Hulandes Stef Blok a firma na Venezuela e acuerdo pa kita e medida cu Venezuela a impone for di 6 di januari. Esaki pa motibo di supuesto contrabanda di metalnan di balor manera oro di Venezuela pa e islanan ABC. Despues Venezuela a uza e sancionnan Europeo como motibo pa laga e frontera cera.
Gobierno di Aruba a comenta despues cu ‘lo eherce controlnan estricto y lo no acepta ilegalidad’. “Tur persona cu kier drenta Aruba mester cumpli cu rekisitonan legal. Productonan di Venezuela por wordo importa solamente si tin un certificado di origen.”
E gobierno tambe ta bisa cu awor cu e medida elimina Aruba ta considera e relacion cu Venezuela ‘normalisa’.
