(ElNacional/AP) – E ex-guardaespalda di Hugo Chavez, Adrian Velasquez Figueroa, a ser extradita di Spaña pa sur di Florida pa enfrenta cargo relaciona cu un red di soborno, segun e periodista di Associated Press, Joshua Goodman. Contra Velasquez Figueroa tin acusacion relaciona cu labamento di placa, na West Palm Beach, Florida.
Husticia Mericano a emiti un citacion pa Velasquez, cu tabata fungi como hefe di servicio di seguridad di e presidente di Venezuela di e tempo ey, Hugo Chavez Frias. Velasquez su extradicion a keda aproba na fin di aña pasa na Spaña. Aunke e citacion ta indica cu e acusado ya ta na Merca, Departamento di Husticia no a confirma e extradicion, pero autoridadnan di Spaña si a haci esey.
E acusacionnan contra Velasquez ta relaciona cu cargo contra Raul Gorrin, propietario di e canal di television Globovision, y Claudia Diaz Guillen, esposa di Velasquez y ex-tesorera Venezolano entre 2011 y 2013.Diaz Guillen a ser extradita na mei pasa, di Spaña pa Merca, y Fiscalia di Distrito Sur di Palm Beach a haya aprobacion pa e muher no keda liber bao di fianza, pa motibo di riesgo di huy. Diaz Guillen ademas tabata enfermera personal di Chavez.
Velasquez ta ex-capitan di Forza Arma Venezolano y hefe di seguridad di Miraflores desde 2007, tempo cu apenas e tabata teniente den Casa Militar, e cuerpo encarga cu seguridad di e presidente.
Diaz tabata asina estrechamente relaciona cu e entorno intimo di Chavez, cu na mei 2011 Chavez a nombr’e pa presidi simultaneamente e dos entidadnan via cual gobierno Venezolano tabata move gran parti di e recursonan financiero publico: Oficina Nacional di Tesoro y e Fondo di Desaroyo (Fonden).
