(LaPatilla/AP) – Oposicion Venezolano a wordo revitalisa recientemente despues di un victoria inespera den eleccionnan di gobernador di e estado natal di e fayecido ex-presidente, Hugo Chavez. Aworaki ta purba di probecha e impulso ey pa uni e fraccionnan dividi y lansa otro intento pa derota nan herederonan politico.
Tres aña despues di autoproclama su mes lider legitimo di Venezuela, Juan Guaido, hunto cu su aliadonan opositor respalda pa Merca y otro adversarionan di presidente Nicolas Maduro lo reuni e siman aki na Caracas pa traha un strategia di gran alcance mientras nan ta prepara pa eleccionnan presidencial, cu nan ta spera por wordo celebra prome cu 2024.
E obhetivo ta “incorpora no solamente e partidonan politico cu ta haci bon e alternativa democratico, incluso incorpora e chavismo, manera ta denomina un grupo, of e chavismo disidente, manera ta denomina tambe otro grupo”, Guaido a splica durante un entrevista cu The Associated Press diahuebs, empleando e termino cu ta defini e movemento politico inicia pa Chavez, ken a fayece na 2013.
E candidatonan di oposicion ta esunnan cu mas voto a haya den e eleccionnan di november 2021. Pero e incapacidad pa uni tras di candidatonan den consenso a haci cu e voto contra Maduro a keda dividi y a permiti su partido gana mas di 200 di e 322 municipionan den wega y e mayoria di e gobernacionnan.
E resultado ey a wordo interpreta manera un señal di e aumento den e potencial di e oposicion, como tambe, segun Guaido a bisa diahuebs, un “yamada di atencion” na e necesidad desespera di reforsa e unidad.
Ademas di e proximo reunion na Caracas, Guaido y otro lidernan di full e pais a convoca un encuentro pa presenta nan plan di unidad na e Venezolanonan, aunke publica nan mensahe ta sigui ta un reto debi na e control estatal ariba e medionan local.
