Presidente interino Juan Guaido y e regimen di Nicolas Maduro a firma un acuerdo pa por atende e crisis di coronavirus na e pais. Ta trata di un “donacion aproba” pa Asamblea Nacional, unico poder den man di oposicion, manera Guaido a bisa riba Twitter.
E acuerdo ta pa busca recurso destina na enfrenta e propagacion di e coronavirus na Venezuela, cu asistencia di Organisacion Panamericano di Salud (OPS), asina ambos banda a confirma. Ministro di Comunicacion di e regimen Chavista, Jorge Rodriguez a duna igual mensahe a traves di television estatal.
E acuerdo, firma dialuna na Caracas, ta establece lineanan “prioritario” den atencion di e pandemia, entre nan e deteccion di caso activo di Covid-19, e vigilancia epidemiologico y tratamento oportuno di e personanan contagia, segun informacion di AFP.
E partidonan no a confirma cual ta e suma calcula necesario pa e plan y tampoco a informa bao ki condicion lo ehecuta e recursonan. E documento cu e ministro a divulga, no ta bisa cu ta trata di un resolucion aproba den Asamblea domina pa oposicion. Rodriguez a acusa e dirigente opositor di trata di “politisa algo cu no tin pakico politisa”.
E convenio a ser firma pa e ministro di Salud di Maduro, Carlos Alvarado; un delegado medico di Parlamento, Julio Castro; y un representante di OPS.
Consulta pa AFP, OPS a confirma e acuerdo, sin duna mas detaye. “OPS ta tumando medida pa apoya e implementacion”, un vocero di e organismo regional cu sede na Washington, a declara.
Washington a celebra e acuerdo entre delegadonan di Maduro y Guaido. “E ta un paso importante, pero solamente un transicion democratico lo salba Venezuela di un catastrofe”, un mensahe publica riba cuenta di e embahada Mericano cera na Venezuela, ta bisa.
