Como medida pa para e critica riba cierto funcionarionan di e gobierno interino di Juan Guaido, involucra den maneho di ayudo internacional na Cucuta, Colombia, e presidente interino di Venezuela a separa tur e personanan, señala den e caso di corupcion, di nan puesto.
E informacion a sali publica den un documento di e Centro di Comunicacion Nacional diasabra pasa. Den e texto gobierno di Guaido a splica cu e personanan señala den e caso di corupcion ta suspendi di nan puesto mientras cu e investigacion ta tuma luga. Tambe a pidi gobierno di Colombia investiga e asunto, como cu e delitonan a tuma luga den e pais bisiña.
Den e comunicado a destaca cu e gobierno interino ta kere den e derecho di defensa y den presuncion di inocencia, pa cual e medida ta representa un acto di responsabilidad y accion diligente.
“Ningun di e recursonan asigna na labor di asistencia humanitario na frontera entre Colombia y Venezuela a ser administra pa un delegacion o organismo di e gobierno legitimo di Venezuela. Tur ayudo humanitario a ser maneha y ehecuta directamente pa e propio agencianan multilateral y pa e ONGnan specialisa den e materia aki,” e documento ta bisa.
Gobierno di e mandatario interino a sigura cu lo solicita formalmente na Organisacion di Estadonan Americano (OEA), na e organisadornan di e concierto Venezuela Aid Live, na Acnur, gobierno di Colombia y tur otro cu a forma parti di e proceso di ayudo humanitario, un notificacion den cual ta certifica loke den su documento Guaido a expresa.
