Lider di oposicion Venezolano, Juan Guaido, a bisa ayera cu oponentenan di Presidente Nicolas Maduro no lo participa den ningun eleccion legislativo trempan cu e convoca entre un lucha pa prolonga poder.
Guaido a bisa den un entrevista cu AP cu lo ta un ‘farsa’ pa participa den cualkier eleccion cu gobierno di Maduro ainda den control di e pais.
E homber reconoci pa Merca como lider legitimo di Venezuela tambe a bisa cu e crisis a afecta e amor di Venezolanonan pa baseball, y e tin plan pa salvaguardia e titulo auto- proclama di ‘Presidente Interino’, hasta despues cu su termino di un aña como lider di e Asamblea Nacional controla pa oposicion ta caba den aña nobo.
El a bisa cu tin señal cu gobierno di Maduro ta debilitando, agregando cu esaki ta resortando na tortura di oponentenan, mientras ta bira mas isola for di su propio hende y comunidad internacional.
Hefe di partido socialista, Diosdado Cabello, un aliado clave di Maduro, a bisa cu eleccion pa Asamblea Nacional – e institucion mas importante domina pa oposicion – lo por tuma luga na januari of mas trempan. E termino di cinco aña di e legislatura lo caba na december 2020, y tradicionalmente ta tene eleccion den e ultimo luna di su termino.
Cabello a bisa cu lo tene eleccion ‘mas pronto cu hende ta kere’.
Hopi a considera dialogo recien, modera pa Noruega na Barbados, entre gobierno di Maduro y su oposicion, como e miho chens di Venezuela pa resolve e crisis. Pero Merca a revela un ronda nobo di sancion severo e luna aki, cual a causa Maduro pa retira di e dialogo.
