(ElNacional) – Juan Guaido a pidi diamars ultimo na e presidente di Colombia, Gustavo Petro, apoya e dialogo entre e antichavismo y e gobierno di Nicolas Maduro cu ya caba ta existi na Mexico, den respuesta na un anuncio di e mandatario Colombiano di continua e proceso aki den su pais den un proximo conferencia internacional, cual su fecha e no a detaya.
“Gustavo Petro, ya ta existi un proceso, un negociacion facilita pa e Noruegonan, cu apoyo internacional,” Guaido a bisa ariba su cuenta oficial di Twitter, unda el a contesta un mensahe di e hefe di Estado Colombiano den cual el a informa cu e ta bay convoca un conferencia pa construi e ruta cu lo permiti e dialogo politico efectivo di e sociedad y e gobierno Venezolano, sin menciona e oposicion.
Guaido di su banda, a sigura cu e ruta ta cla y ta enfoca den celebra eleccionnan presidencial liber na 2024, pero el a expresa locual si falta ta boluntad politico di parti di e presidente Maduro di bay mas leu cu e medidanan retorico concreto cu lo permiti avance.
E antichavista a bisa cu ta bon pa Petro papia cu e representante mediador di Noruega, Dag Nylander, tocante con nan por avansa e negociacionnan, cu a cuminsa na november di aña pasa despues di tabata suspendi durante un aña y cu ta pega desde e tempo ey, y respalda e apoyo di e presidente Mexicano, Andres Manuel Lopez Obrador, y di e mandatario Mericano, Joe Biden, ademas di e Union Europeo (UE).
Di otro banda el a señala cu e cercania di Petro cu Maduro si por ta hopi util pa permiti cu e eleccion primario opositor, cu lo tuma luga dia 22 di october di e aña aki pa elegi un candidato cu lo enfrenta e chavismo otro aña, tuma luga sin obstaculo ni tardamento.
E conferencia proponi pa Petro lo wordo realisa na Bogota, posiblemente pa e dianan despues di semana santa cu invitadonan di Europa, Latino America y Merca, segun e presidencia Colombiano a detaya y e presencia di Maduro ainda no ta confirma, aunke no ta descarta ainda.
