Diamars atardi pasa presidente interino Juan Guaido a bolbe su pais despues di un gira na Europa y Merca y a drenta, a pesar di tur menasa di regimen di Nicolas Maduro, via e porta di acceso principal di e pais: aeropuerto di Maiquetia.
Na su yegada na e aeropuerto tabatin simpatisante di Nicolas Maduro cu a trata di agredi Guaido pero den oranan di anochi el a logra yega Plaza Bolivar di Chacao pa saluda su simpatisantenan.
Guaido, cu un sonrisa y acompaña pa e diputadonan di Asamblea Nacional, a cuminsa bisando “Esaki ta pa boso, esaki ta pa e famia,” aplaudiendo tur Venezolano pa e lucha cu nan a hiba y cu ta sigui kere den Venezuela. Ademas el a indica cu “danki na e studiante, dirigente, trahador, bisiña, profesor y enfermeranan (…) awe mi a trece e compromiso di mundo liber, e pais no ta hinca rudia, no ta rindi, ta digno.”
Tocante e constante menasanan di e regimen Guaido a bisa cu “nan no mester enfrenta mi, pasobra ya nos a derota nan caba, di basta tempo.” El a señala cu ta trata di un dictadura isola, y cobarde. “Cobarde, Nicolas. Na nomber di e Venezolanonan, ata nos aki.”
Ademas el a corda e regimen cu comunidad internacional tin conocimento di e escala di violencia y indiferencia di e organismonan di seguridad den esey.
Den otro contexto, e presidente interino a observa cu “lo tin un recuperacion economico pronto, nos a bay papia di futuro pa reconstrui e pais. Nos no ta nos so.” Guaido a bisa cu e ta pidi forsa di tur Venezolano, aunke e sa cu ta duro pa pidi esey di esnan cu no tin cuminda, ni awa, ni luz.
