Presidente encarga di Venezuela, Juan Guaido, asigura diasabra pasa cu a manda un carta pa Luis Almagro, secretario general di Organisacion di Estadonan Americano (OEA) pa inicia e reincorporacion di e pais den e Tratado Interamericano di Asistencia Reciproca (Tiar), asina Guaido a skirbi riba su cuenta di Twitter.
“Nos ta avansa den e direccion ey, evaluando responsabelmente e miho opcion, cu por genera e cambio di forma mas rapido pa sali di e crisis profundo aki, den cual nos ta biba,” el a añadi despues.
Durante e manifestacion na plaza Alfredo Sadel di Las Mercedes diasabra pasa, cu no a atrae tanto publico, Guaidoa comenta cu e embahador Venezolano na Estadonan Uni, Carlos Vecchio, a ser instrui pa comunica cu Comando Sur (SouthCom) Mericano, pa logra acelera cooperacion internacional.
E tratado TIAR ta data di aña y ta encera e posibilidad, y obligacion, pa e paisnan miembro duna asistencia na otro, riba peticion di e pais cu ta señala un necesidad dentro di su teritorio. Como unico organo reconoci como legitimo den un gran cantidad di pais di continente Americano y Europeo, Asamblea Nacional, di mayoria opositor y dirigi pa su presidente Juan Guaido, ta considera cu e organismo legislativo ta faculta pa pidi entrada atrobe na e Tratado, despues cu gobierno Chavista na aña 2012 a retira e pais.
Nota di Redaccion: Tratado Interamericano di Asistencia Reciproca (TIAR), tambe yama Tratado di Rio, ta un pacto di defensa mutuo-Interamericano firma na september 1947 na Rio de Janeiro. E area di e tratado ta continente America y 300 miya pafo di costa. E paisnan cu a renuncia den ultimo añanan ta Bolivia, Mexico, Nicaragua, Ecuador y Venezuela.
