Ayera presidente interino di Venezuela, Juan Guaido, a informa den entrevista cu e medio El Diario cu tabatin “contacto” entre integrante di e Comite di Postulacion di Asamblea Nacional y representante di gobierno di Nicolas Maduro. Recientemente Maduro a laga su tribunal supremo kita autoridad di Asamblea Nacional di nombra Conseho Nacional Electoral (CNE).
Guaido a bisa cu e contactonan ey tabata pa discuti e conformacion di un Conseho Nacional Electoral. “Nos a laga bon cla pa e regimen cu nos no lo presta nos mes pa un fraude y cu nos lo reconoce solamente un CNE independiente nombra pa Asamblea Nacional.” Guaido a declara den e entrevista cu a bisa esey pa e keda bon cla pa tur hende. “E unico institucion cu por nombra CNE y cu ta garantisa cu e tin reconocimento nacional y internacional ta Asamblea Nacional. E dictadura por trata di ripiti cualkier fraude y por purba talvez loke nan a haci na 2018 y e resultado lo ta mescos pa nan.”
“Mi ta kere cu lo ta bon pa nos tur tin bon cla cu na 2018 e fraude cu nan a purba set up pa nos no a keda rechasa na Venezuela so, sino na mundo, loke a conduci na e reconocimento di e gobierno legitimo interino na 2019 pa mas di 60 pais, loke a pone e dictadura den e peor posicion den su historia.”
Riba e pregunta cu si oposicion ta prepara pa bay eleccion den poco tempo, Guaido a contesta cu e forzanan democratico semper a lucha pa por tin eleccion presidencial den cual e pueblo por haya su soberania atrobe y dicidi su futuro. Sin embargo, e problema fundamental segun Guaido no ta di banda di e forzanan democratico, sino di e banda di e dictadura cu te awor aki a blokea tur iniciativa.
