Presidente interino Juan Guaido a manifesta ayera cu tabatin mas di 5.000 protesta cortico, entre 12:00 or di merdia y 14:00 or di atardi, den henter e pais, como muestra di rechaso di e crisis den cual e pais ta pasando y pa reclama terminacion di e “usurpacion di poder” di banda di Nicolas Maduro den presidencia.
Sin embargo, e no a ofrece detaye acerca di e cantidad di persona cu por a participa na e protestanan.
E propio Guaido a convoca e manifestacion diadomingo pasa, cu a pidi e simpatisantenan pa nan actua di manera pacifico y no blokea e camindanan, pero keda riba acera. Asina en principio cada skina di cada caya den henter e teritorio por a converti den un manifestacion.
Agencia EFE por a constata cu den parti oriental di Caracas, un teritorio considera bastion di oposicion, e protestanan tabata modera y e rutina diario a sigui su curso.
Pero den centro di e capital, unda tin e barionan mas pober, varios centenar di persona a concentra den cercania di Hospital J.M. De los Ros, unda ta atende mucha y adolescente, mientras nan tabata lansa consigna contra Maduro y tabata lanta borchi cu tabata denuncia e “crisis humanitario” den cual e pais ta pasando. Tambe tabatin un grupo di ‘colectivo’ Chavista riba motorcycle cu tabata intimida e manifestantenan. Riba rednan social tambe tabatin notificacion di varios manifestacion similar den varios otro ciudad di e pais.
