Despacho di Presidencia Interino a emiti un comunicado tocante e demanda di e empresa Canades Crystallex den corte na Merca contra Pdvsa y propiedadnan di Citgo na e pais ey.
E documento ta referi na e veredicto di Corte na estado Delaware di 29 di juli ultimo, cu ta autorisa Crystallex pa embarga e accionnan di PDV Holding (100% propiedad di Pdvsa) pa recupera e 1.400 miyon dollar como daño y perhuicio pa e expropiacion di parti di regimen di Chavez den añanan anterior.
Gobierno interino, encabesa pa Guaido, a enfatisa cu Nicolas Maduro a actua contra interes di Venezolanonan firmando un acuerdo cu Crystallex sin autorisacion di Asamblea Nacional. E acuerdo lo ta encera e pago di mas di 400 miyon dollar na Crystallex pa deshaci di e demanda di e compania minero.
Tambe a sigura cu danki na e intervencion di Embahador nombra pa Guaido, Carlos Vecchio, y e Hunta di Gerencia Ad Hoc di Pdvsa, e tribunal di Delaware lo permiti pa bolbe introduci alegato di Prome Instancia pa reapertura di e debate hudicial for di su inicio.
Na e momento aki Crystallex no lo por ehecuta e embargo riba e activonan di Citgo, debi na e blokeo cu gobierno di Donald Trump ta mantene riba nan. Tambe e comunicado ta elogia e maneho di Procurador Special Jose Ignacio Hernandez, tambe nombra pa e Presidente Interino, den e intentonan pa mantene patrimonio di e pais y di Pdvsa.
Mientras tanto, Fiscal General Tarek William Saab a anuncia di a habri un investigacion penal contra Hernandez pa su actuacion den e caso aki.
