(LaPatilla) – Presidente interino di Venezuela, Juan Guaido, a reitera diaranzon pasa den entrevista cu e periodista Carmen Aristegui pa CNN en Español, cu obhetivo di e acercamento politico cu e regimen Chavista, teni na Mexico, ta pa yega na un proceso electoral liber y transparente.
“Loke nos no por permiti, encuanto e proteccion di e republica, pa e Venezolanonan cu awor ta den un situacion di vulnerabilidad pa ausencia di servicio, pa ausencia di respet di derechonan fundamental, tin un bashi di poder”, Guaido a enfatiza. E lider democratico a recorda tambe cu “tin un reconocimento claro di henter mundo na e momento aki, tin e acompañamento di comunidad internacional.”
Segun su criterio, e obhetivo ta referi na articulo 333 di Constitucion Venezolano: eleccion liber y husto, cuminzando cu un cronograma. Guaido a indica cu e proceso di negociacion ta pa trata di acelera e proceso pa logra precisamente un solucion pa e conflicto, y cu esey ta e yamado di e alternativa democratico cu e ta representa.
Tambe Guaido a elabora riba e posibilidad di un referendo revocatorio, contempla den constitucion, cu a trata di emplea na 2016 – pa revoca presidencia di Maduro – loke e regimen a usa pa ilegaliza oposicion democratico. Guaido a bisa CNN cu nan ta sperando tramite pa haya legalidad di e Unidad democratico atrobe.
Mientras tanto ministro di Defensa di Venezuela, Vladimir Padrino Lopez, a responde riba expresion di hefe di Comando Sur Mericano, Craig Faller, cu diamars pasa a comenta cu e (Faller) ta spera un salida diplomatico via negociacion. Padrino a declara via Twitter cu “e situacion na Venezuela lo resolve entre Venezolano, un respuesta soberano na un situacion interno”.
E convenio firma pa duna inicio na e negociacion no ta referi den ningun punto na e posicion di forzanan arma, responsable di represion sistematico na e pais durante e regimen Chavista.
