Hefe di Parlamento, Juan Guaidó, reconoci como Presidente Interino di Venezuela na mas di 50 pais, ayera a anuncia e creacion di un ‘Centro di Gobierno’ cu lo coordina tur representante cu a nombra na su gestion y cu e opositor Leopoldo López lo ta na na cabes.
“Pa e creacion di e Centro di Gobierno nos a nombra Leopoldo López”, Guaidó a bisa na un conferencia di prensa, den cual a informa riba e nombramento di e diputado den exilio na Colombia, Julio Borges, como Comisionado Presidencial pa Relacionnan Exterior.
E lider opositor tambe a yama e Abogado Humberto Prado como Comisionado Presidencial pa Derechonan Humano y Atencion na Victimanan, e Ingeniero Alejandro Plaz pa Desaroyo Economico, y tambe e Abogado Javier Troconis pa e Gestion y Recuperacion di Activo.
E gobierno interino di Venezuela a informa cu cada un lo bay tin un adhunto y un comision. Den e proximo dianan, lo bay nombra e agregado militar na varios pais.
Ademas, a ratifica e Comision di Ayudo Humanitario, di plan pais y tambe strategia pa atencion di e crisis. “E usurpacion a dura hopi mas di loke nos tur kier. E nombramento aki ta cumpli cu e rol di acelera pa pone fin esey”, Guaidó a expresa.
