Presidente interino di Venezuela, Juan Guaido, a reconoce diasabra pasa e erornan cometi durante ‘Operacion Libertad’ cu el a entama contra regimen di Nicolas Maduro. E no ta descarta un opcion militar di Merca na Venezuela hunto cu e tropanan cu a lanta contra Chavismo, bisando cu e lo hiba cualkier oferta di Washington di e tipo aki pa votacion den Asamblea Nacional di su pais.
Den un entrevista exclusivo cu The Washington Post, Guaido a admiti cu su ekipo a calcula malo e apoyo cu e tabatin dentro di ehercito y e tabata spera cu Maduro lo a renuncia, mey mey di un ola di desercion den e forsanan Chavista despues di su yamado pa uni na banda di pueblo mobilisa riba caya.
Guaido, presidente di Asamblea Nacional, y desde januari proclama presidente interino di Venezuela, a aclara cu e no ta apoya un intervencion militar unilateral di Estadonan Uni, sino cu e ta propone un colaboracion Mericano coordina cu forsanan Venezolano cu a bira contra Maduro. “Pero e no a duna mas detaye di loke lo ta aceptable,” Anthony Faiola, e coresponsal di Washington Post, cu a entrevista Guaido na Caracas, a nota.
Riba e pregunta kico e lo haci si John Bolton, asesor di seguridad nacional Mericano, propone un intervencion militar na Venezuela, el a contesta cu lo considera esaki y talvez aproba tambe.
Esaki ta e comentario mas fuerte cu Juan Guaido a haci tocante e tema delicado di intervencion di exterior den e pais, pa logra restaura democracia na Venezuela.
Guaido a bisa cu el a ricibi cu beneplacito e reciente deliberacion na Washington encuanto opcionnan militar, calificando nan como “gran noticia”.
Di otro banda, aunke tin mas yamado internacional haci na oposicion pa sinta conversa cu Maduro pa resolver e crisis humanitario na Venezuela, Guaidoa reitera cu e ta nenga dialoga, sin e condicion previo di cu Maduro mester sali di poder.
“Sinta cu Maduro no ta un opcion,” el a afirma, Y el a conclui: “Esey a pasa na 2014, na 2016, na 2017. Fin di usurpacion ta un condicion previo pa cualkier posible dialogo.”
