Presidente interino di Venezuela y presidente di Asamblea Nacional, Juan Guaido, a sigura diasabra pasa cu el a “ricibi e mensahe” di e regimen di Nicolas Maduro, cu a pone su tio den prison siman pasa, despues di nan yegada hunto na Caracas.
Den su prome rueda di prensa despues di su biahe di 23 dia, Guaido a manifesta cu, cu e medida aki e regimen no ta bay logra nada y a anuncia protesta nobo pa cual el a pidi compromiso di su compatriotanan y sancion di aliadonan contra regimen di Nicolas Maduro.
Guaido a descarta e posibilidad cu oposicion lo participa na eleccion organisa pa Maduro. “Nos no ta bay presta nos mes pa ningun farsa. Nos ta bay eleccion, pero eleccion limpi, cu garantia pa tur actor,” el a sigura, como respuesta na e proposicion di e lider Chavista cu diabierna pasa a pidi dialoga pa logra un Conseho Electoral Nacional (CNE) pa supervisa eleccion parlamentario e aña aki. E regimen ta pretende cu e proceso lo por ta supervisa pa e parlamento paralelo, cu no ta conta cu mayoria, dirigi pa Luis Para.
Durante su intervencion den e rueda, Guaido a mantene un tono desafiante contra Maduro, ken e no a stop di yama un “dictador” y a mustra dispuesto pa forsa un transicion den e pais. Tambe el a bisa cu Maduro su tempo a caba, acusando Maduro di ta busca regla asunto “pidiendo cacao” cerca presidente Trump.
Guaido no kier a profundisa den detaye tocante su conversacion cu presidente Trump y otro lidernan internacional pero a bisa si cu tin un strategia concebi. Entre otro tin un pacto pa para e trafico ilegal di oro y tin acuerdo pa reconstruccion di e pais y tambe pa finalisa argumento contra Maduro den Corte Penal Internacional na Den Haag.
