Presidente interino di Venezuela, Juan Guaido, a yega Davos pa atende e Foro Economico Mundial cu ta tumando luga na Davos, Suisa, durante su gira a traves di Europa, pa fortifica e apoyo di e paisnan Europeo pa e lucha contra dictadura Chavista.
Durante un discurso el a ripiti su palabranan duna na Bruselas pa Parlamento Europeo: “Awe mi ta aki pa esnan cu no tin voz,” den mesun sala unda anteriormente presidente Mericano a hiba palabra.
Guaido a sigura esnan presente cu oposicion a mantene “unidad na Venezuela a pesar di e teror di e dictadura” y a recorda e audiencia cu “Asamblea Nacional ta e unico organo elegi via voto popular.”
“Si nos mester bula muraya pa por yega trabao, manera nos mester a haci cu e diputadonan, nos lo hacie,” el a bisa referiendo na e reciente intentonan di e dictadura Chavista pa impedi acceso di e parlamentarionan na edificio di Asamblea. Y el a resalta: “Y nos no ta bay descansa te ora nos logra nos segundo independencia.”
Tambe el a referi na e apoyo cu dictadura di Maduro ta brinda na grupo terorista manera ELN di Colombia y Hezbollah di Libanon, financia cu oro “di sanger” roba y a adverti pa e peligro cu a gruponan aki ta representa pa e region.
Guaido a asumi como presidente interino di Venezuela exactamente un aña pasa, despues cu Nicolas Maduro a inicia un segundo mandato, considera ilegal pa oposicion y parti importante di comunidad internacional, entre otro Estadonan Uni y Union Europeo, den un contexto di collapse di economia y di un crisis migratorio, cu a mira como cinco miyon Venezolano busca otro destino.
