Presidente encarga di Venezuela, Juan Guaido, reconoci pa mas di 50 pais, a bisa ayera cu el a sostene comunicacion “hopi discreto” cu militarnan Venezolano, destacando cu e forsanan arma di e pais no ta scapa di e realidad cu un mayoria abrumador kier un cambio di gobierno.
“Nos tabatin comunicacion hopi discreto, naturalmente cu e militarnan, pero no ta e momento pa duna cierto precision pasobra lamentablemente aki (Venezuela) nos ta bibando den un dictadura. Persecucion ta na orden di dia,” Guaido a bisa den un entrevista na radio RPP.
El a sigura cu “91% di e Venezolanonan” kier un cambio di gobierno di mandatario Nicolas Maduro, y cu “Forsanan Arma no ta scapa di esey.”
E famia militar y tur cu ta vincula na e crisis na Venezuela sa den kico nos ta bibando,” e dirigente politico a bisa.
Segun Guaido, ta existi “algun rasgo importante di malestar” den e miembronan di Forsanan Arma, cu e ta considera “e ultimo apendice” cu ta keda di soporta regimen dictatorial Maduro.”
El a declara cu e forsanan libertario “lo sigui lucha di manera pacifico, no violento, pero hopi contundente pa logra e paso adicional ey y recupera democracia.”
Guaido a denuncia e existencia di mil preso politico na su pais, entre nan su hefe di despacho Roberto Marrero, mientras cu e responsabelnan di e empresanan di zonido uza den manifestacionnan opositor a keda deteni brevemente y mester presenta na tribunal. Sin embargo, el a sigura cu a pesar di persecucion, e respaldo ta crece.
